De skyldfrie

av Gaute Heivoll

Tiden, 2016

Systrene Sigrid og Edit veks opp saman med mora Johanna i eit strengt religiøst, norsk bygdemiljø, der kvardagen i mellomkrigstida er spunne rundt bedehuset, landhandlaren og skulen. Sigrid søkjer seg bort på husmorskule, og den 15 år gamle Edit kjenner seg svikta av storesystera ho har så nære band til. 

På same tid kjem den 23 år gamle Embret som ny skulestyrar til bygda. Han flyttar inn på loftet i skulehuset, der han finn etterlatne papir frå den førre skulemeisteren. Dette leier han ut i ei uimotståeleg freisting, og han viklar seg etter kvart inn i eit flokete nett av lygner, skuld og skam. 

Sigrid kjem etter kvart heim og giftar seg med Embret, og snart kjem også onkelen til jentene, akademikaren Sem, til bygda. Då slår katastrofen ned i den vesle familien, som blir sett overfor eit skjebnesvangert val.

De skyldfrie er eit kjenslesterkt trekantdrama bygd på tradisjonell realisme, og i motsetning til tidlegare romanar skriv Heivoll denne gongen rein fiksjon. Han skriv fram tydelege karakterar i eit vakkert språk, der lesaren verkeleg får vondt av og føler med personane i deira botnlause sjølvbedrag.

Merete Byrøygard

Lom folkebibliotek